डॉ0हरि नाथ मिश्र

क्रमः....*अठारहवाँ अध्याय*(गीता-सार)

ग्यानवान-त्यागी नर सोई।

सुद्ध सात्विकी जग रह जोई।।

     नहिं आसक्त कर्म, हितकारी।

      अस जन सँग न द्वेष,अपकारी।।

होवहि त्याग कर्म-फल त्यागा।

जग नहिं संभव सभ परित्यागा।।

     भला-बुरा वा जे जग मध्यम।

      तीन प्रकार होय फल सिद्धम।।

मिलै अवसि इन्हमहँ कोउ एका।

पुरुष सकामिहिं कर्मइ जेका।।

    त्यागी-कर्म होय निष्कामा।

     मिलै न फल कोऊ बुधि धामा।।

कारन पाँच साँख्य अनुसारा।

करमहिं सिद्धि हेतु सुनु सारा।।

    कर्ता-चेष्टा-करण-अधारा।

    दैव हेतु अहँ पाँच प्रकारा।।

कर्म सास्त्र-गत वा बिपरीता।

होंवहिं कारन पाँच सहीता।।

     जे आत्मा कहँ मानै कर्त्ता।

      ऊ दुरमति-मतिमंद न बुझता।।

मैं नहिं कर्त्ता जासुहिं भावा।

कबहुँ न अस जन पाप बँधावा।।

     ग्याता-ग्यान-ग्येय तिन प्रेरक।

     कर्म-प्रबृत्ति कै तीनिउँ देयक।।

कर्त्ता-करण-क्रिया के जोगा।

बनै कर्म कै पार्थ सुजोगा।।

दोहा-ग्यान-कर्म-कर्त्ता-गुनहिं,अहहिं ये तीन प्रकार।

       कहे कृष्न सुनु पार्थ तुम्ह,साँख्य-सास्त्र अनुसार।।

                    डॉ0हरि नाथ मिश्र

                     9919446372 क्रमशः......