नूतन लाल साहू

ममा भांचा

सुन ले सगा,ये गोठ ला

कुटुंब गंगा में,आज नहाके

दरसन परसन कर ले

आशीर्वाद,तोला मिलही

अपन भांचा के

छत्तीसगढ़ मा अडबड़ नाता हे

पर पवित्र नाता हे,ममा भांचा के

धरम झोली ल, तैहर भर ले

भवसागर पार यदि जाना हे,ते

सुन ले सगा

मरजादा कोंहू, लांघो झन

आज समाज मा,नवा सोच के

जिनगी मा कुछू बने के बात कर ले

पर मत भूलना,पवित्र रिश्ता हे ममा भांचा के

सुन ले सगा

ददा के तोला,मया मिले

दाई के तोला मिले,आंचल

धरती मा पुण्य कमा ले

अपन भांचा के पांव पखार के

सुन ले सगा

कभू बडोरा डराही तोला

कभू शरद गरम के ताव

जियत मरत लेे,तै झन भुलाबे

अपन भांचा के पांव ला

सुन ले सगा

मदिरा मांस ला त्याग दे भाई

सनमारग के बात सुहाही

लाहरा ह रोक लिही तोला

तब भांचा के आशीर्वाद,काम आ ही

सुन ले सगा ये गोठ ला

कुटुंब गंगा में आज नहाके

दरसन परसन कर ले

आशीर्वाद, तोला मिलही

अपन भांचा के

नूतन लाल साहू