चतुर्थ चरण (श्रीरामचरितबखान)-9
अस कह बाली निज तन त्यागा।
पाइ कृपा प्रभु अरु अनुरागा।।
बिकल बियोगहिं तारा देखा।
कहे मिटै नहिं बिधि कै लेखा।।
तारा सुनु ई अधम सरीरा।
छिति-जल-पावक-गगन-समीरा।
निर्मित अस तन काम न काहू।
रुदन तोर नहिं सोहै आहू।।
माया-मुक्त पाइ अस ग्याना।
तारा भई सुबिग्य-सुजाना।।
बुला सुग्रीवहिं कह रघुबीरा।
मृतक क करम करउ धरि धीरा।।
लखन बुलाइ कहे प्रभु रामा।
करहु राज सुग्रीवहिं नामा।।
दोहा-लखन बुला पुर-जन तुरत,बिप्र समच्छ पद-राज।
सुग्रीवहिं कहँ देइ के,अंगद किन्ह जुवराज ।।
स्वारथ बस सुर-नर-मुनी,मातु-पिता,गुरु-बंधु।
करहिं प्रीति जग महँ सभें,राम सकल संबंधु।।
पुनि बुलाइ सुग्रीव प्रभु,राज-पाट सभ दीन्ह।
कहे करउ अब राज तुम्ह,सँग अंगद कहँ लीन्ह।।
डॉ0हरि नाथ मिश्र
9919446372
दसवाँ अध्याय (श्रीकृष्णचरितबखान)-5
छूइ चरन तब धाइ प्रभू कै।
करन लगे स्तुती किसुन कै।।
हे घनरूप सच्चिदानंदा।
हे जोगेस्वर नंदहिं नंदा।।
अहउ तमहिं परमेस्वर नाथा।
सकल चराचर तुम्हरे साथा।।
तुमहिं त जगतै स्वामी सभ जन।
अंतःकरण-प्रान अरु तन-मन।।
तुम्ह अबिनासी अरु सभ-ब्यापी।
रहहु अदृस सभकर बपु थापी।।
तुम्ह महतत्वयि प्रकृति स्वरूपा।
सुक्ष्मइ सत-रज-तमो अनूपा ।।
तुम्ह परमातम जानन हारा।
सूक्ष्म-थूल-तन कर्मन्ह सारा।।
समुझि न आवै तुम्हरी माया।
जदि उर बृत्ति-बिकार समाया।।
तुमहीं अद्य-भविष्यत-भूता।
नाथ भगत जन एकल दूता।।
बासुदेव प्रभु करहुँ प्रनामा।
पर ब्रह्महिं प्रभु सभ गुन-धामा।।
प्रनमहिं हम दोउ भ्रात तुमहिं कहँ।
तुमहिं भगावत पाप मही कहँ।।
लइ अवतारहिं धारि सरीरा।
हरहिं नाथ सभ बिधि जग-पीरा।।
पुरवहिं प्रभू सकल अभिलासा।
बनै निरासा तुरतै आसा ।।
साधन-साध्यइ अहहिं कन्हैया।
मंगल अरु कल्यान कै नैया।।
परम सांत जदुबंस-सिरोमन।
निसि-दिन रहैं सबहिं के चित-मन।।
प्रभु अनंत हम सभ प्रभु-दासा।
प्रभुहिं त आसा अरु बिस्वासा।।
दोहा-नारद कीन्ह अनुग्रहहि, भयो दरस प्रभु आजु।
तारे प्रभु हम पापिहीं,सुफल जनम भे काजु।।
डॉ0हरि नाथ मिश्र
9919446372
कोई टिप्पणी नहीं:
एक टिप्पणी भेजें